Агым суга ташламыйлар
Ак каен каерысын.
Аккошлар да бергә-бергә,
Без нигә аерым соң?

Бир кулыңны, гүзәлем,
Синсез өзелә үзәгем.

Агыйделнең суы салкын,
Салкын тирәнгә күрә.
Һич исләремнән чыкмыйсың,
Өзелеп сөйгәнгә күрә.

Бир кулыңны, гүзәлем,
Синсез өзелә үзәгем.

Ишек алдым салкын чишмә,
Суын эчеп туймадым.
Әйтер сүзем әйталмадым,
Күрешербез дип уйладым.

Бир кулыңны, гүзәлем,
Синсез өзелә үзәгем.

Биек таудан чәчәк җыйдым,
Җыймадым сарыларын.
Үзең тапсаң, миңа да бир
Сабырлык даруларын.

Бир кулыңны, гүзәлем,
Синсез өзелә үзәгем.